BAKI, 19 yanvar — Sputnik. Ermənistan silahlı qüvvələrinin yanğın təhlükəsizliyi idarəsinin rəisi işdən çıxarılıb.
Bu barədə Ermənistan İctimai Televiziyası məlumat yayıb.
Buna səbəb kimi Ermənistan Müdafiə Nazirliyinin hərbi hissəsində 15 hərbçinin ölümü ilə nəticələnən yanğın göstərilib.
Lakin işdən çıxarılan idarə rəisinin adı açıqlanmayıb.
Qeyd edək ki, ötən gecə Ermənistanın Qeqarqunik (Basarkeçər) rayonunun Azad (Azat) kəndində N saylı hərbi hissənin mühəndis-istehkam bölüyünün kazarmasında yanğın baş verib. Hadisə nəticəsində 15 hərbçi ölüb.
Ermənistan silahlı qüvvələrinin 2-ci ordu korpusunun komandiri polkovnik Vahram Qriqoryanın da tutduğu vəzifədən uzaqlaşdırılacağı barədə məlumatlar yayılıb.