BAKI, 23 oktyabr - Sputnik. Sərbəst güləşçimiz Xadjimurad Qadjiyev İspaniyanın Pontevedra şəhərində keçirilən U-23 dünya çempionatında gümüş medal qazanıb.
Azərbaycan Güləş Federasiyasının yaydığı məlumata görə, çempionatda 74 kiloqram çəki dərəcəsində çıxış edən güləşçimiz startda kolumbiyalı Sebastyan Rodrigesə heç bir şans tanımayıb - 13:2.
Yığmamızın üzvü səkkizdəbir finalda Şri-Lanka təmsilçisi Kusumsiri Palamureyə də vaxtından əvvəl qalib gəlib - 10:0.
X.Qadjiyev ermənistanlı Hrayr Alixanyana 4:2 hesabı ilə qalib gələrək yarımfinala yüksəlib. Daha sonra moldovalı Vasili Diakonu minimal fərqlə (4:3) üstələyən X.Qadjiyev adını finala yazdırıb.
Təmsilçimiz həlledici görüşdə iranlı Məhəmmədsadiq Firuzpurbandpeylə qarşılaşıb və 2:5 hesabı ilə məğlub olaraq gümüş medalla kifayətlənib.
Beləliklə, sərbəst güləş üzrə millimiz dünya çempionatını 1 gümüş və 2 bürünc medalla başa vurub.