BAKI, 10 aprel - Sputnik. Pakistan hakimiyyət orqanları “icazə sənədi” olmayan dövlət məmurlarına ölkəni tərk etməyi qadağan edib. Sputnik Azərbaycan xəbər verir ki, bu barədə Dawn Federal Təhqiqat Agentliyinin yüksək rütbəli rəsmisinə istinadən məlumat yayıb.
Mənbə bildirib ki, Federal Təhqiqat Agentliyinin immiqrasiya üzrə əməkdaşları ölkədəki bütün beynəlxalq hava limanlarında yüksək hazırlıq vəziyyətinə gətirilib. Onlara icazə sənədi olmadan xaricə səyahət etmək niyyətində olan bütün dövlət məmurlarını dayandırmaq tapşırılıb.
O, həmçinin qeyd edib ki, hava limanının təhlükəsizlik qüvvələri də yüksək hazırlıq vəziyyətinə gətirilib və xaricə gedən sərnişinlərin yoxlanılması gücləndirilib.
Onun sözlərinə görə, qərar Pakistandakı siyasi vəziyyətlə əlaqədar verilib.
Bundan əvvəl Pakistan parlamenti baş nazir İmran Xana etimadsızlıq səsverməsi keçirib. Bu qərarın lehinə 174 deputat səs verib. Yeni baş nazirin seçilməsi ilə bağlı səsvermə bazar ertəsi, aprelin 11-də keçirilməlidir.
Pakistanda siyasi böhran aprelin 3-dən etibarən müşahidə olunur. Xarici mənbələrin verdiyi məlumatlara görə, İmran Xanı hakimiyyətdən götürmək cəhdlərinin arxasında ABŞ dayanır. Vaşinqton İslamabadın müstəqil siyasəti, guya Rusiya və Çinlə yaxınlaşmasından narazıdır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.