BAKI, 4 fevral — Sputnik. Azərbaycan nümayəndə heyəti Pekin-2022 Qış Olimpiya Oyunlarının açılış mərasimində paraddan keçib.
Sputnik Azərbaycan xəbər verir ki, tədbirdə Dövlət bayrağını fiqurlu konkisürən Vladimir Litvintsev daşıyıb.
Azərbaycan paradda iştirak edən 42-ci ölkə olub. Açılışa komandanın şef de-missionu, Milli Olimpiya Komitəsinin Beynəlxalq Əlaqələr İdarəsinin müdiri Anar Bağırov və məşqçi Aleksey Çetveruxin də qatılıblar.
Azərbaycan nümayəndə heyəti Pekin-2022 Qış Olimpiya Oyunlarının açılış mərasimində
© AFP 2024 / JEWEL SAMAD
Tamaşaçılar önündən Olimpiadanın vətəni Yunanıstan birinci, Türkiyə ikinci, Malta isə üçüncü keçib.
Azərbaycanın Olimpiya komandası fevralın 4-18-də keçiriləcək yarışda iki idmançı ilə təmsil olunacaq. Hər iki idmançımız fiqurlu konkisürmə növündə mübarizə aparacaq. Vladimir Litvintsev kişilərin, Yekaterina Ryabova qadınların yarışında buz üzərinə çıxacaqlar.
Azərbaycan nümayəndə heyəti Pekin-2022 Qış Olimpiya Oyunlarının açılış mərasimində
© AFP 2024 / MANAN VATSYAYANA
Azərbaycan Olimpiya komandasının bayraqdarı Vladimir Litvintsev fevralın 8-də və 10-da yarışacaq. Yekaterina Ryabovanın yarışı fevralın 15-də və 17-də baş tutacaq.
Pekin Qış Olimpiya Oyunlarına ümumilikdə 19 min könüllü cəlb olunub. Bu barədə Beynəlxalq Olimpiya Komitəsinin sessiyasında təşkilat komitəsinin vitse-prezidenti Yanq Şuan məlumat verib.
Oyunlar fevralın 20-də başa çatacaq.