BAKI, 24 dekabr — Sputnik. Hazırda istifadədə olan Füzuli hava limanının inşası zamanı qədim tarixə malik maddi mədəniyyət nümunələri aşkarlanıb. Buradan tapılan eramızın I minilliyinə aid tarixi əşyalar Füzuli Tarix-Diyarşünaslıq Muzeyinə təhvil verilib.
O bildirib ki, 44 günlük Vətən Müharibəsindən sonra işğaldan azad edilən Füzuli rayonunun ərazisində dərhal quruculuq işləri başlayıb. Bu quruculuq işlərində yerin altında təkcə minalar, silah-sursat yox, həm də muzey əhəmiyyətli tarixi əşyalara da rast gəlinib ki, hazırda həmin əşyalar Füzuli rayonunun Tarix-Diyarşünaslıq Muzeyində saxlanılır. Tapıntılar arasında eramızın I minilliyinə aid əşyalar da var. Elçin Əsədov deyib ki, həmin tapıntılar əsasən Əhmədbəyli-Şuşa avtomobil yolunun çəkilişi və Füzuli Hava Limanının inşası zamanı aşkarlanıb.
Muzeydə olarkən onun da şahidi oluruq ki, tapılan əşyaların əksəriyyəti məişət əşyalarıdır. Mis məmulatlarından düzəldilmiş əşyalar isə üstünlük təşkil edir. Bunlar arasında qədim kasa, sini, badya, kəfgir və digərlərinin adını sadalamaq olar. Elçin Əsədov deyir ki, aparılan quruculuq və abadlıq işləri zamanı elə tarixi faktlara rast gəlinib ki, bu hətta onların özləri üçün də təəccüb doğurub.
“Bəzən quruculuq işləri zamanı dərin qatları qazdıqda oradan küplər, durna çırağı, xəncərlər çıxırdı ki, bunlar da müxtəlif dövrləri əhatə edir. Ən yeni tarixə məxsus əşyalar əsasən mis məmulatlarıdır ki, bunlar XX əsrin əvvəllərində burada yaşayış olduğunu bir daha sübuta yetirir. Həmçinin, həmin dövrə aid məişət əşyaları da aşkarlanaraq muzeyimizə təhvil verilib”.
Müsahibimizlə söhbət zamanı onu da öyrənirik ki, son vaxtlar rast gəlinən tarixi faktlar arasında eramızın I minilliyinə aid olan əşyalara, həmçinin orta əsr nümunələrinə də rast gəlmək mümkündür.
Muzeyin rəhbəri bildirir ki, hazırda burada sərgilənən əşyalar ilkin tapıntılardır. O, aşkarlanan faktlarla bağlı Füzuli rayonunda arxeoloji qazıntıların aparılacağını da istisna etmir.
“Bu əşyalar ilkin tapıntılardır. Burada genişmiqyaslı arxeoloji qazıntılar aparılacaq. Gələcəkdə planlaşdırılır ki, işğaldan azad edilmiş rayonlarda yeni muzeylər yaradılsın, azərbaycanlıların bu və bu kimi qədim tarixini özündə əks etdirən əşyalar həmin muzeylərdə sərgilənsin. Hazırda muzeydə sərgilənən tarixi əşyalar rayona üz tutan xarici qonaqların, eləcə də yerli sakinlərin böyük marağına səbəb olub. Həmsöhbətimiz bildirir ki, xarici qonaqlar ən çox işğaldan azad edilmiş rayonlardan tapılan əşyalara maraq göstərirlər”.
“Bura gələn qonaqlara bildirirlər ki, işğaldan azad edilən ərazilərin qədim tarixi Azərbaycan xalqının tarixi-keçmişini özündə əks etdirir və hazırda muzeylərdə olan bu əşyalar bizim dədə-baba torpaqlarımızdan tapılıb. Gələcəkdə Füzuli, Cəbrayıl, Zəngilan və digər işğaldan azad edilmiş torpaqlarda insanlar öz yurdlarına köçdükdən sonra çoxlu əşyalar tapılaraq, yaradılacaq olan muzeylərin ekspozisiyasını dolduracaq və bu kimi tarixi muzeylərin sayını artıracaq”.
Hazırda işğaldan azad edilən torpaqlarımızda ermənilər nə qədər tarixi abidələrimizi məhv etməyə çalışıblarsa da, onlar bir faktı unudublar ki, bu yerlər bizim ata-baba yurdumuzdur. Buradakı hər daş, hər qaya, hər addımda ayaq basdığımız torpaq bizim tarixən bu yerlərin sahibi olduğumuzu bir daha sübuta yetirir. Axı bu müqəddəs torpaqların hər qatında bizim tarixi keçmişimizi özündə əks etdirən çuxurlar var. O çuxurlar ki, bizim qədim tariximizlə yoğurulub. Bu tarix bizə, Azərbaycan xalqına məxsusdur və illər yox, əsrlər ötsə də bu faktı danmağa və gizlətməyə heç kəsin gücü yetməz. Elə Füzuli rayonunda da hər addımda rast gəlinən tarixi keçmişimizin qalıqları bunu bir daha sübuta yetirir...
Azərbaycanda
həyətyanı sahədə arxeoloji tədqiqat: abidə tək alban kilsəsindən ibarət deyil
"Ən yaxşı turistik kənd" adı uğrunda mübarizədə Azərbaycandan bir namizəd var
Azərbaycanlı arxeoloq bizi 3 milyon il bundan əvvələ apardı
Lələtəpə Neolit dövrü yaşayış yerində yeni tapıntılar aşkar edilib
Qaraçinar qədim yaşayış məskəni - ölkədə ikinci bu cür ərazi yoxdur