BAKI, 8 dekabr — Sputnik. Azərbaycan Mərkəzi Bankı tərəfindən ölkəmizdə rəqəmsal manatın yaradılması üzərində tədqiqatlar aparılır.
Bu barədə Bakıda keçirilən “Nağdsız iqtisadiyyat: etibarlı, təhlükəsiz və dayanıqlı” mövzusunda V Beynəlxalq Bankçılıq Forumunda çıxış edən İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib.
“Pulla bağlı 3 inqilabi dəyişiklik olub. Sonuncu dəyişiklik blokçeyn texnologiyaları əsasında kriptovalyutaların dövriyyəyə buraxılması oldu. Artıq rəqəmsal manatın yaradılması istiqamətində işlərə başlanılıb. Hökumətdə bu barədə danışıqlar gedir”, - Qasımlı qeyd edib.
Onun sözlərinə görə, "infrastrukturu dəyişsək belə, insanın rəqəmsal transformasiyaya uyğunlaşmasa çox çətin olacaq".
"Yuanın rəqəmsal məsələdə dollardan bir addım öndə olması artıq onu göstərir ki, biz rəqəmsal valyuta aləmində böyük bir dəyişikliyin şahidi olacağıq. Rəqəmsal valyuta da demək olar ki, geniş miqyasda bizim maliyyə bank sektorunu tamamilə dəyişəcək", - Qasımlı deyib.
Dekabrın 8-də Bakıda V Beynəlxalq Bankçılıq Forumu işinə başlayıb. Sputnik Azərbaycan xəbər verir ki, "Nağdsız iqtisadiyyat: etibarlı, təhlükəsiz və dayanıqlı" mövzusunda keçirilən forum "MasterCard"ın tərəfdaşlığı ilə baş tutub.
Forumda "Rəqəmsal bank", "Hər cihazda bankçılıq", "Platforma bankçılığı və rəqəmsal ekosistem", "İnnovativ ödəniş ekosistemi", "Rəqəmsal valyutalar: mərkəzi banklara gedən yol", "Blokçeyn texnologiyası: maliyyə xidmətlərində tarixi layihələr", "Təkmilləşən ekommersiya: artan tələb", "Komplaynsa fokuslanma", "Distant bankçılıq: təhlükəsiz identifikasiya", "Yeni normal: yeni kibertəhlükəsizlik trendləri" mövzuları ətrafında müzakirələr aparılacaq.
Forum dekabrın 9-da işini davam etdirəcək.
Həmçinin oxuyun:
Rəqəmsal manat iqtisadiyyatımıza nə verəcək
Bitkoin aprel ayından bu yana ilk dəfə olaraq 60 min dollara yaxınlaşıb