BAKI, 12 avqust — Sputnik. Prezident İlham Əliyev işğaldan azad olunmuş ərazilərdə tikililərin müvəqqəti reyestri haqqında Fərman imzalayıb.
Sputnik Azərbaycan-ın məlumatına görə, Fərmanda Nazirlər Kabinetinə tapşırılıb ki, iki ay müddətində "Azərbaycan Respublikasının işğaldan azad olunmuş ərazilərində müvəqqəti xüsusi idarəetmənin təşkili haqqında" Azərbaycan Respublikası Prezidentinin 2020-ci il 29 oktyabr tarixli 1170 nömrəli Fərmanının 7.4-cü bəndinə uyğun olaraq aparılmış inventarlaşdırmanın nəticələri əsasında işğaldan azad olunmuş ərazilərdə tikililərin mövcud vəziyyəti və həmin tikililərdə baş verən dəyişikliklər barədə məlumatların uçotunun aparılması, habelə tikililərin sökülməsi sahəsində dövlət orqanlarının (qurumlarının) çevik əlaqələndirilmiş fəaliyyətinin təmin edilməsi məqsədilə işğaldan azad olunmuş ərazilərdə tikililərin müvəqqəti reyestrini (bundan sonra – reyestr) yaratsın, Azərbaycan Respublikası İqtisadiyyat Nazirliyinin və Azərbaycan Respublikası Dövlət Şəhərsalma və Arxitektura Komitəsinin təklifləri əsasında "İşğaldan azad olunmuş ərazilərdə tikililərin müvəqqəti reyestri haqqında Əsasnamə"ni təsdiq etsin, işğaldan azad olunmuş ərazilərdə bərpa və yenidənqurma işlərinin daha səmərəli təşkili məqsədilə reyestrə daxil olan tikililərin müvafiq ərazidə tikinti niyyətinin həyata keçirilməsi zərurəti ilə bağlı sökülməsi qadağan edilən, sökülməsinə rəy tələb olunan və sökülməsi mümkün olan kateqoriyalar üzrə bölgüsünü təsdiq etsin, Fərmandan irəli gələn digər məsələləri həll etsin.
Fərmanda qeyd olunur ki, sökülməsi mümkün olan tikililərin sökülməsinə bu barədə məlumat təqdim edildikdən, digər tikililərə münasibətdə isə sökülmənin məqsəduyğunluğuna dair aidiyyəti üzrə Azərbaycan Respublikası Prezidentinin xüsusi nümayəndəsinin, Fövqəladə Hallar Nazirliyinin, Mədəniyyət Nazirliyinin, Dövlət Şəhərsalma və Arxitektura Komitəsinin bu Fərmanda nəzərdə tutulan "İşğaldan azad olunmuş ərazilərdə tikililərin müvəqqəti reyestri haqqında Əsasnamə" ilə müəyyən edilən qaydada rəy verilməsindən sonra həyata keçirilir.
Dövlət Şəhərsalma və Arxitektura Komitəsinə tapşırılıb ki, Fərmandan irəli gələn tələblərə riayət edilməsinə nəzarəti həyata keçirsin, Fərmandan irəli gələn digər məsələləri həll etsin.
Eləcə də oxuyun:
Ermənistanın təcavüzündən aqrar sektora dəymiş ziyanın kompensasiya edilməsinə başlanılıb
Zəfər yolu nə vaxt hazır olacaq? - Hidayət Rüstəmov görülən işlərdən danışır