BAKI, 3 avqust — Sputnik. Əfqanıstan hakimiyyəti Taliban hərəkatı ilə yalnız təşkilatın terroru dəstəkləməyi dayandıracağı şərti ilə əməkdaşlıq etməyə hazırdır. Sputnik Azərbaycan Rusiya mediasına istinadən xəbər verir ki, bunu Əfqanıstanın xarici işlər naziri Məhəmməd Hənif Atmar deyib.
"Biz Talibanla işləməyə, onları hökumətə götürməyə və hakimiyyəti onlarla bölüşməyə hazırıq. Bunun üçün yalnız bir şərtimiz var - ölkənin daxilində Əfqanıstanın gələcəyi xalqın azad iradəsi ilə həll edilməli, xarici sərhədlərdə heç bir təhlükə yaranmamalı və bizdə heç bir xarici terror qüvvəsi olmamalıdır. Terroru dəstəkləməyi dayandırması şərti ilə hökumətimiz Talibanı onun bir hissəsi kimi qəbul etməyə hazırdır", - deyə Atmar "İzvestiya" qəzetinə müsahibəsində bildirib.
XİN rəhbəri onu da deyib ki, hazırda Taliban xarici müttəfiqlərin köməyi ilə 34 əyalətdən 31-də hökumət qüvvələri ilə mübarizə aparır.
"Bu, Talibanın ən qeyri-insani və şiddətli kampaniyasıdır", – deyə Məhəmməd Hənif Atmar bildirib.
Qeyd edək ki, avqustun 2-də Əfqanıstan Müdafiə Nazirliyi 455 Taliban döyüşçüsünün məhv edilldiyini açıqlayıb.
Əfqanıstanda hökumət qüvvələri ilə taliblər arasında qarşıdurma davam edir. Ölkədə qeyri-sabitlik ABŞ administrasiyasının sentyabrın 11-nə qədər ölkədən qoşunların çıxarılacağı barədə vədləri fonunda artıb.
Eləcə də oxuyun:
Taliblər Gilmənd əyalətindəki televiziya mərkəzini ələ keçiriblər
Taliblər irəliləyir, ABŞ şəhərləri bombalayır: 100 min qaçqın – bu, hələ başlanğıcdır
Əfqanıstan ordusu Herat əyalətinin rayonlarından birini taliblərdən azad edib