Zülfiyyə Quluyeva, Sputnik Azərbaycan
BAKI, 10 aprel — Sputnik. Son günlər "Facebook" sosial şəbəkəsində açıq havada maska qadağasının ləğv olunması məqsədilə #nefesalaq, #acıqhavadamaskayayox həştəqləri ilə kampaniya başlayıb.
Daxili İşlər Nazirliyinin (DİN) Mətbuat Xidmətinin KİV və İctimaiyyətlə əlaqələr şöbəsinin rəisi Elşad Hacıyev Sputnik Azərbaycan-a açıqlamasında bildirib ki, açıq havada maskadan istifadəyə havaların isinməsi ilə əlaqədar heç bir dəyişiklik edilməyib. E.Hacıyev bildirib ki, Nazirlər Kabineti yanında Operativ Qərargahın müvafiq qərarı ilə açıq və qapalı məkanlarda maskadan istifadə məcburidir. Bu qaydalara hər bir şəxs əməl etməlidir. Qaydanı pozanlar qanunvericiliyə uyğun şəkildə cərimə olunurlar:
"Nazirlər Kabinetinin müəyyən etdiyi qərarlar qüvvədədir. Havalarla bağlı hər hansı norma müəyyən olunmayıb".
Qeyd edək ki, 2020-ci il noyabrın 21-dən etibarən açıq havada maska taxmayanlar 100 manat cərimə edilirlər. Bu, Baş nazir Əli Əsədovun imzaladığı “Xüsusi karantin rejimində tənəffüs yollarını qoruyan fərdi vasitələrdən istifadə ilə bağlı əlavə tədbirlər haqqında” 451 saylı qərarda nəzərdə tutulub. Qərarın birinci bəndində qeyd edilib ki, Azərbaycan ərazisində yeni növ koronavirus (COVID-19) infeksiyasının insanlar arasında kütləvi yayılmasının qarşısının alınması məqsədilə açıq havadakı ictimai yerlərdə tənəffüs yollarını qoruyan fərdi vasitələrdən (tibbi maska, parça maska, respirator və sair) istifadə edilməsi məcburidir.
Bu maddəyə görə, epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər 100 manat məbləğində, vəzifəli şəxslər 200 manat məbləğində, hüquqi şəxslər 400 manat məbləğində cərimə edilirlər.
Həmin xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər iki yüz manat məbləğində, vəzifəli şəxslər dörd yüz manat məbləğində, hüquqi şəxslər səkkiz yüz manat məbləğində cərimə edilirlər.