BAKI, 13 dekabr — Sputnik. Türkiyənin sabiq Baş və Xarici İşlər naziri Əhməd Davudoğlu yeni partiya yaradıb. Sputnik Azərbaycan "Sözcü"yə istinadən xəbər verir ki, bu gün Ankarada Gələcək Partiya adlı siyasi partiyanın toplantısı keçirilib.
Məlumatda qeyd olunur ki, partiyanı 154 nəfər təsis edib.
Gələcək Partiyanın emblemi isə yaşıl rəngdə çinar yarpağı, şüarı isə "Bizim bir gələcəyimiz var"dır.
"Dostlarımızla birgə tarixin və millətimizin önündəyik. Bütün təzyiqlərə və formalaşdırılan qorxu atmosferinə baxmayaraq, ölkəmizə rifah və varlıq içərisində bir gələcək yaratmaq üçün bir araya gəldik. Siyasətimizin təməli insan qürurunu qorumaq və yüksəltməkdir. İnsana laqeyd münasibət göstərən dövlət davamlı ola bilməz", - deyə Davudoğlu bildirib.