BAKI, 6 iyul — Sputnik. Bu gün futbol üzrə dünya çempionatında ilk 1/4 final oyunları keçiriləcək.
İlk olaraq Bakı vaxtı ilə saat 18.00-da Uruqvay və Fransa milliləri üz-üzə gələcəklər. Oyun Nijni Novqorod şəhərində keçiriləcək.
Xatırladaq ki, Fransa 1/8 finalda Argentinaya, Uruqvay isə Portuqaliyaya qalib gəlib. Fransızlar sonuncu dəfə yarımfinalda 2006-cı, Uruqvay isə 2010-cu ildə oynayıb.
Günün digər qarşılaşması Braziliya və Belçika yığmaları arasında olacaq. Bu millilər yarımfinal uğrunda oyunu Kazanda keçirəcəklər. Görüş 22.00-da başlayacaq.
Braziliya 1/8 finalda Meksikaya, Belçika isə Yaponiyaya qalib gəlib. Braziliyalılar sonuncu dəfə yarımfinalda 2014-cü, belçikalılar isə 1986-cı ildə oynayıblar.