İradə Cəlil, Sputnik Azərbaycan
BAKI, 27 may — Sputnik. "Oğlum narkotik maddələr aludəçisi idi. Onun müalicəsi üçün əlimdən gələni etməyə hazır idim. Və beləcə Rusiyada "Genesiz" reabilitasiya mərkəzini tapdıq", — deyə Sputnik Azərbaycan-a müraciət edən Nahidə Həsənova bildirir.
O qeyd edir ki, oğlu Həsənov Nahid yanvarın 13-dən aprelin 11-ə qədər Krasnodar vilayətində yerləşən "Genesiz" reabilitasiya mərkəzində narkoloji müalicədə olub.
"Krasnodarda olan oğlumun vaxtı aprelin 13-ü bitirdi. O, müalicəsini davam etdirmək üçün miqrasiya xidmətindən keçirilməli idi. Reabilitasiya mərkəzi hər ay 800 dollar olmaqla yanaşı, miqrasiya xidmətinin haqqını da bizdən almışdı. Oğlum orada 6 aylıq müalicə kursu keçməli idi. Mənə bildirmişdilər ki, 3 aydan sonra onu aparıb yaxın sərhədlərin birindən keçirəcəklər", — N.Həsənova deyir.
İddia edir ki, aprelin 9-da onlar qadından daha 800 dollar istəyiblər. Səbəb olaraq isə göstəriblər ki, onlar Soçi şəhərinə gedəcəklər və N.Həsənovu oradan Abxaziya sərhədindən keçirəcəklər. Bundan sonra N.Həsənova tələb olunan pulu göndərib: "Mən də ayın 10-u pulu göndərdim. Göndərdiyim bütün pulların çekləri, pul göndərdiyim şəxslərin pasportunun sürəti məndə var".
Şikayətçi qadın iddia edir ki, həmin şəxslər onu aldadıblar: "Aprelin 11-də onlar mənim oğlumu aparıblar, lakin miqrasiya kartını götürməyiblər. Oğluma deyiblər ki, get, Abxaziya sərhədini keç, gəl. İki nəfər oğlumla gedib, amma onlar sərhədi keçməyiblər. Halbuki, onların bütün xərclərini ödəmişdim".
Ananın dediyinə görə, oğlu sərhədi keçən kimi onu saxlayıblar: "Aprelin 12-də məhkəmə olub, oğlumun yanında heç kim olmayıb. Onlara dedim ki, oğluma vəkil tutun. Həbs olunma səbəbini də öyrənməyə çalışdım. Min bəhanə gətirdilər. Sonra məndən 900 dollar pul istədilər ki, biz sizin oğlunuzu həbsdən çıxaracağıq, qoymayacağıq deportasiya edilsin. Mən ayın 12-də 700 dollar göndərdim. Məhkəmə bitdikdən sonra oğlumu iki gün daha saxlayıblar, sonra əli qandallı deportasiya ediblər".
Bundan sonra mərkəzdən N.Həsənovaya bildiriblər ki, onların Minskdə də şöbələri var: "Dedilər ki, oradan mütəxəssis çağıraq, oğlunuzla Bakıya gəlsin və yenidən biletlərini alarsınız, qayıdarlar Minskə. Bir ay da pulsuz müalicə edəcəklərinə söz verdilər. Oğlumun bütün əşyaları reablitasiya mərkəzində qalmışdı. Dedilər ki, onu göndərmək üçün pulumuz yoxdur. Mən yenidən 50 dollar göndərdim".
Bu təklifdən sonra N.Həsənova oğlunun Minskdə müalicə alması üçün bilet alıb. Ancaq səfirlikdən öyrənib ki, N.Həsənov Minskə də gedə bilməz.
Hazırda Nahidə xanım Xarici İşlər Nazirliyinə müraciət edib, oğlunun məhdudiyyətini götürtmək istəyir.
Ana onu da vurğulayır ki, "Genesiz" reabilitasiya mərkəzindən onun 1500 dollar pulu qalıb. Verdiyi puldan ancaq 500 dolları geri qaytarılıb, geri qalan hissəni almaq üçün çalışır.
Hüquqşünas Vurğun Şahbazov Sputnik Azərbaycan-a bildirib ki, məsələ qarışıq olduğu üçün Nahidə Həsənova Rusiyanın Azərbaycandakı səfirliyinə müraciət etməlidir.
"Hadisə Rusiyada olduğu üçün oranın qanunverciliyi ilə tənzimlənməlidir. Buna görə də xanım Rusiya səfirliyinə müraciət etsin. Əlindəki faktları təqdim etsin. Bundan sonra dəymiş ziyanı geri qaytarmaq mümkün ola bilər", — V.Şahbazov qeyd edib.