Emin Əlisahib, Sputnik Azərbaycan
BAKI, 15 mart — Sputnik. Xocavənd rayonunun işğaldan azad edilmiş ərazisində 1980-ci il təvəllüdlü İman Baxşəliyev minaya düşüb. Xocavənd rayon Prokurorluğundan Sputnik Azərbaycan-a verilən məlumata görə, aparılmış araşdırmalarla İman Baxşəliyevin kənd-təsərrüfat fəaliyyəti ilə məşğul olarkən qeyd edilən ərazidə minaya düşməsi nəticəsində çoxsaylı xəsarətlər alması müəyyən edilib. Yaralı Ağcabədi rayon Xəstəxanasına gətirilib.
Xəstəxanadan Sputnik Azərbaycan-a bildirilib ki, xəsarət alan şəxsin sağ ayağının topuqdan aşağı ətrafı amputasiya edilib. Hazırda vəziyyəti orta ağır olaraq qalır. Baş verən hadisə ilə bağlı Xocavənd rayon Prokurorluğu araşdırma aparır.
