Eldar Tanrıverdiyev, Sputnik Azərbaycan
BAKI, 30 sentyabr — Sputnik. "Azərbaycanın təkbaşına işğal altındakı torpaqlarını azad etməyə gücü çatır. Biz dövlət və millət olaraq Azərbaycanın yanındayıq". Sputnik Azərbaycan "Anadolu" agentliyinə istinadən xəbər verir ki, bunu Türkiyənin Xarici İşlər naziri Mövlüd Çavuşoğlu bildirib.
O qeyd edib ki, artıq bu problem həll edilməlidir: "Azərbaycanın yanında olmağa davam edəcəyik".
Çavuşoğlu deyib ki, Ermənistan Azərbaycana hücumları ilə "beynəlxalq sistemi və hüququ heçə sayıram" deyir. Bununsa bir qarşılığı olmalıdır.
Beynəlxalq Birliyə səslənən Türkiyə Xarici İşlər naziri deyib:
"Ermənistana dərhal geri çəkilsin deyirlər. Amma konkret təklifiniz varmı? Yox, onda bu problem necə həll olunacaq?".
O, eyni zamanda vurğulayıb ki, Azərbaycan əxlaqda da, hüquqda da haqlıdır və bütün ölkələr işğala məruz qalmış digər ölkələrdə olduğu kimi Azərbaycanı da dəstəkləməlidir.
