BAKI, 17 sentyabr — Sputnik. Polşa Milli Prokurorluğunun istintaq qrupu 2010-cu ildə Polşa Prezidenti Lex Kaçinskini daşıyan təyyarənin qəzaya uğraması zamanı Smolensk-Severnı aerodromunda işləmiş dispetçerlərin müvəqqəti həbs edilməsi barədə Varşava dairə məhkəməsinə ərizə verib.
Sputnik Azərbaycan xarici mediaya istinadən xəbər verir ki, müvafiq məlumatı qurumun mətbuat katibi Eva Byalik yayıb.
Ərizə dispetçerlərin beynəlxalq həbs orderinin verilməsi üçün ilk addımdır. Məhkəmə müvafiq qərarı verərsə, hüquq-mühafizə orqanları dispetçerləri həbs etmək üçün addımlar ata bilər.
Bu arada Rusiya Federasiya Şurasının beynəlxalq komitə sədrinin müavini Andrey Klimov RİA Novosti ilə müsahibəsində bildirib ki, Moskva təyyarənin qəzaya uğraması zamanı Smolensk aerodromunda işləmiş aviasiya dispetçerlərini Varşavaya verməyəcək:
“Bu, Rusiya Konstitusiyası ilə qadağandır. Polşa “işi bununla da bağlamalıdır”.
Lex Kaçinskinin ölümü
Polşa lideri Lex Kaçinskini daşıyan Tu-154 təyyarəsi 2010-cu il aprelin 10-da Smolensk-Severnı aerodromunda eniş zamanı qəzaya uğrayıb. Kaçinski də daxil olmaqla 96 nəfər həlak olub.
Rusiyanın İstintaq Komitəsi faciənin ekipaj səhvinin və çətin meteoroloji şəraitlərin də daxil olduğu bir çox faktorlar səbəbindən baş verdiyini müəyyən edib. Beləliklə, 11 metr yüksəklikdə təyyarə ağaca çırpılıb, bundan sonra onun qanadının bir hissəsi qopub və layner fırlanmağa başlayıb. Bir neçə saniyə sonra təyyarə çevrilmiş vəziyyətdə yerə düşüb.
Polşanın aviasiya qəzalarının araşdırılması üzrə komissiyası ekipajın səhvə yol verdiyini etiraf etsə də, dispetçerlər tərəfindən uçuşun aeronaviqasiya təminatının az olduğunu və aeroportun texniki cəhətdən zəif təmin olduğunu qeyd edib. 2018-ci ildə bu qərar ləğv edilib və təkrar araşdırma başlayıb.
