XXII Yay Olimpiya Oyunları 1980-ci il 19 iyul-3 avqust tarixlərində Sovet İttifaqında keçirilib. Bu olimpiada sosialist ölkəsində və Şərqi Avropa ərazisində keçirilən ilk oyunlar kimi tarixə düşüb.
O zaman SSRİ-dəki olimpiadanı boykot edən ölkələrin sayı az deyildi. Lakin bu, onun nailiyyətlər baxımından əhəmiyyətli olmasına mane olmayıb.
Yarışların 14 günü ərzində beş qitənin idmançıları 74 olimpiya, 39 Avropa və 36 dünya rekordu qırıblar.
Moskvadakı olimpiadada 25 ölkənin atletləri qızıl medal qazanıb, 36 dövlətin nümayəndəsi oyunların mükafatçısı olub.
Tərkibində Azərbaycandan idmançıların da olduğu SSRİ yığması 21 idman növü üzrə yarışlarda iştirak edərək 195 medal, o cümlədən 80 qızıl, 69 gümüş və 46 bürünc medal qazanıb, bununla da medal hesabında birinci yeri tutub.
Qeyd edək ki, sovet idmançıları 1980-ci ilin Oyunlarında təmsil olunan bütün idman növlərində medal qazanıblar.
