BAKI, 14 iyun — Sputnik. Koronavirusdan sağalanların ağciyərləri çox uzun müddət ərzində bərpa olunur. Bunu Sputnik radiosuna açıqlamasında Piroqov adına Rusiya Milli Tibbi Tədqiqat Universitetinin professoru, pulmonoloq Aleksandr Karabinenko deyib.
Mütəxəssis qeyd edib ki, infeksiya səbəbindən insanın tənəffüs sisteminin işi çətinləşir və onun ağciyərləri zədələnir. Xəstələndikdən sonra ağciyərlərdə fibroz dəyişikliklər əmələ gəlir.
“İnsanlarda struktur dəyişikliyi baş verir, bunlar isə uzunmüddətli bərpa tələb edir”, - həkim qeyd edib.
Karabinenkonun sözlərinə görə, ağciyər toxumaları zamanla özləri bərpa oluna bilir, ancaq bu müddət hər bir insanın orqanizminin fərdi xüsusiyyətlərindən asılıdır.
Bir müddət öncə isveçli həkimlər zədələnmiş ağciyər toxumalarını kök hüceyrələri ilə müalicə etməyi təklif etmişdilər. Qeyd olunurdu ki, kök hüceyrələr immun sisteminin kəskin respirator distress sindroma, yəni ağciyərlərin qanı oksigenlə təmin edə bilməməsinə səbəb olan kəskin reaksiyasını əngəlləməyə qadirdir.
