BAKI, 29 oktyabr — Sputnik. Ermənistan silahlı bölmələrinin Azərbaycanın Zəngilan rayonunu işğal etməsindən 26 il ötür.
Sputnik Azərbaycan-ın məlumatına görə, 1993-cü il oktyabrın 28-dən 29-na keçən gecə ermənilər Zəngilan rayonunu zəbt edib.
Füzuli və Cəbrayıl rayonları işğal olunduqdan sonra zəngilanlılar 67 gün tam mühasirə şəraitində düşmənlə vuruşublar. Oktyabrın 25-dən etibarən 4 gün ərzində Zəngilan rayonunun əhalisi 235 nəfər şəhid və itkin verib. Amma düşmən tankları dörd tərəfdən rayona hücuma keçiblər və zəngilanlılar silahlı birləşmələrin qarşısını ala bilməyiblər.
Ermənilərin Zəngilanda ikinci Xocalı faciəsi törətmək istəyi alınmayıb. Sakinlər özlərini Araz çayına atmaqla İran ərazisinə keçiblər və bununla da qırğından xilas olublar.
Ərazisi 707 kvadrat kilometr olan Zəngilan rayonu işğal olunanda əhalisi 35,6 min nəfər olub.
Zəngilan rayonu eyni adlı şəhərdən, Mincivan qəsəbəsindən və 83 kənddən ibarətdir. Rayonda 14 tibbi müəssisəsi, 11 uşaq bağçası, 62 ümumtəhsil məktəbi, 23 klub, 8 mədəniyyət evi, 3003 min cild kitab saxlanılan 70 kitabxana olub. Zəngilanın iqtisadiyyatının əsasını kənd təsərrüfatı-üzümçülük, tütünçülük və heyvandarlıq təşkil edib.
