BAKI, 27 mart — Sputnik. Azərbaycan Ordusunun şəhid olan əsgəri Əllaz Əllazov bu gün dəfn olunub. Sputnik Azərbaycan-ın bölgə müxbirinin məlumatına görə, dəfn mərasimində Qazax Rayon İcra Hakimiyyətinin (RİH) başçısı və RİH-in əməkdaşları, habelə hüquq mühafizə orqanlarının vəzifəli şəxsləri, şəhidin komandirləri və əsgər yoldaşları, eləcə də rayon sakinləri iştirak ediblər.
Azərbaycan Respublikasının Dövlət Bayrağı şəhidin atasına təqdim edilib. Yaylım atəşindən sonra, 20 yaşlı şəhidimiz Əllaz Əlləzov doğulduğu Yuxarı Salahlı kənd qəbristanlığında nənə və babasının qəbrinin yanında dəfn olunub.
Xatırladaq ki, dünən Ermənistan silahlı qüvvələri cəbhənin müxtəlif istiqamətlərində təxribatlara əl atıb. Müdafiə Nazirliyindən verilən məlumata görə, axşam saatlarında düşmən tərəfindən bölmələrimizin mövqelərinin atəşə tutulması nəticəsində cəbhənin Füzuli rayonu istiqamətində Azərbaycan Ordusunun hərbi qulluqçusu Əlləzov Əlləz Ələddin oğlu şəhid olub.
