BAKI, 11 oktyabr — Sputnik. "Ermənistan Dağlıq Qarabağ münaqişəsi üzrə danışıqlar prosesinin formatının dəyişdirilməsi məsələsini qaldırmayıb". Sputnik Azərbaycan "Armenpress"-ə istinadən xəbər verir ki, bunu "France 24" telekanalına müsahibəsində Ermənistanın baş naziri Nikol Paşinyan deyib.
"Danışıqlar prosesi ATƏT-in Minsk Qrupunun həmsədrləri formatında davam etməlidir" — deyə Paşinyan qeyd edib.
Erməni baş nazir, eyni zamanda MDB sammitinin kuluarlarında Azərbaycan Prezidenti İlham Əliyevlə görüşünə və əldə olunan razılaşmalara da toxunub. O vurğulayıb ki, Əliyevlə, yalnız Dağlıq Qarabağ münaqişəsinin nizamlanması məsələsini deyil, həm də dinc yolla nizamlanma üçün lazımi atmosferin yaradılması məsələsini də müzakirə ediblər.
"Dinc nizamlanma üçün lazımi atmosfer olmadıqda münaqişənin nizamlanmasından danışmaq olmaz. Biz Azərbaycan – Ermənistan sərhədi və cəbhə xəttində gərginliyin azaldılması üçün bır sıra problemlərlə bağlı razılığa gəldik" — deyə Paşinyan vurğulayıb.
