BAKI, 4 iyun — Sputnik. Ermənistanda özəl daşıyıcı şirkətlərə məxsus avtobusların sürücüləri etiraz aksiyası keçirirlər. Buna səbəb hökumətlərarası lisenziyanın olmamasından dolayı, həmin sürücülərə Rusiya ilə sərhədi keçməyə icazə verilməməsidir.
Sputnik Ermənistan xəbər verir ki, şirkətin nümayəndələri hökumətin binası qarşısında toplaşaraq lisenziya alınmasını və tariflərə yenidən baxılmasını tələb edirlər. Mələsə bundan ibarətdir ki, iyunun 1-dən qeyri-müntəzəm şəkildə Ermənistandan Rusiyaya və ya əks istiqamətdə sərnişin daşıyan sürücülərə hökumətlərarası lisenziya olmadan Rusiya sərhədini keçmək qadağan olunub. Ermənistan qanunvericiliyinə əsasən, sərnişin daşıma üçün lisenziyalar yalnız müntəzəm olaraq Rusiyaya və ya əks istiqamətdə sərnişin daşıyan şirkətlərə verilir.
"İyunun ikisindən bizim maşınları "Baqratşen" nəzarət keçid məntəqəsindən buraxmadılar. Bizə bildirdilər ki, biz müvafiq razılaşmanı Yerevanda, Nəqliyyat Nazirliyindən almalıyıq", — deyə Ermənistandan Rusiyaya qeyri-müntəzəm sərnişin daşımaları ilə məşğul olan firmalardan birinin direktoru Anjela Astanosyan bildirib.
"Bir dəfə gediş üçün 150 000 min dram (528 AZN) həcmində vergi tələb edirlər. 150 000 ödəyirsən və sənə sənəd verirlər. Lakin bundan sonra da səni cərimələyə bilərlər. Bu 150 000 mindən əlavə, dolu və boş olmasından asılı olmayaraq hər bir oturacağa görə də 2400 dram (8,45 AZN) tələb edirlər", — deyə digər şirkətin direktoru Artak Knazyan diqqətə çatdırıb.
Sürücülər sərnişin daşımalarını həyata keçirmək üçün lisenziyanın əldə olunması üçün keçirilən tenderlərdən narazıdırlar və onlar bütün daçıyıcılar üçün eyni şərtlərin yaradılması üçün əvvəlki lisenziya sisteminə qayıtmağı tələb edirlər.
Hazırda hökumətin binası qarşısına toplaşan sürücülər baş nazir Nikol Paşinyanla görüş tələb edirlər. Onların sözlərinə görə, bu problemi yalnız danışıqlar yolu ilə həll etmək olar.
