BAKI, 11 yanvar — Sputnik. Rusiyanın Moskvada iranlı həmkarı Cavad Zəriflə görüşən xarici işlər naziri Sergey Lavrov yanvarın 29-da Soçi şəhərində keçiriləcək Suriya Milli Dialoq Konqresi ilə bağlı vacib açıqlama verib.
Sputnik Azərbaycan "Timeturk"-ə istinadən xəbər verir ki, zirvənin əhəmiyyətini vurğulayan Lavrov Türkiyə və İranla birlikdə Suriyada sülhə çox yaxınlaşdıqlarını deyib: "Əgər bu gün Suriyada vəziyyət ciddi mənada müsbətə doğru dəyişibsə, bunda Türkiyə, Rusiya və İranın rolu olduqca böyükdür. Bu üç ölkənin səyi nəticəsində regionda stabillik bərpa olunmaqdadır".
"Rusiya, Türkiyə və İranın ötən il başlatdığı "Astana prosesi" sayəsində Cenevrə danışıqları daha da əhəmiyyət qazandı. Bu, üç ölkənin təşəbbüsü ilə Suriya Milli Dialoq Konqresinə hazırlıq mərhələsinə keçildi" — Sergey Lavrov əlavə edib.
