BAKI, 26 sentyabr — Sputnik. Rusiyalı biznesmen, Azərbaycan əsilli Fərhad Əhmədov Roman Abramoviçdən satın aldığı 360 milyon dollar dəyərindəki 115 metrlik "Luna" adlı yaxtasıyla ailəsi ilə birlikdə Egey dənizinin sahillərində istirahət edib. Əhmədovlar bölgədə 10 gün qalıblar. Biznesmen Mərmərisdə türk sənət dünyasında səs-küyə səbəb olmuş bir alış-verişə imza atıb.
Əhmədov 35 yaşlı türk rəssam Güçlü Kadir Yılmazın bir tablosunu 10 min dollara satın alıb. "Existentialis" adlı əsəri əslində biznesmenin həyat yoldaşı Tatyana Əhmədova bəyənib.
Əsərinin tanınmış kolleksiyaçı tərəfindən satın alınmasından böyük şərəf duyduğunu bildirən rəssam Kadir Yılmaz deyib:
"Sırf kolleksiyasına daxil edilsin deyə bir çox rəssamlar Əhmədova əsərlərini hədiyyə etmək istəyir, amma o qəbul etmir. Mənim əsərimi bəyənməsi, üstəlik bazarlıq etmədən satın alması mənə və əsərimə önəm verdiyini göstərir. İnternetdə əsəri ona satdığımızı bildiriəndən sonra sənət dünyası bizdən danışmağa başladı. Əhmədovun tablomu kolleksiyasına daxil etməsi, iş həvəsimi artırdı. Bu hadisə Türkiyənin tanınmasına da töhfə verəcək. Buna görə ayrıca seviniriəm və şərəf duyuram".
