BAKI, 21 avqust — Sputnik. Türkiyə Avrasiya İttifaqı ilə gömrük müqaviləsi bağlamaq niyyətindədir. Sputnik Azərbaycan "Hürriyet"-ə istinadən xəbər verir ki, bunu Türkiyənin iqtisadiyyat naziri Nihad Zeybəkçi 86-cı Beynəlxalq İzmir Yarmarkasında deyib.
"Avrasiya İqtisadi İttifaqı ilə gömrük sazişinin imzalanması haqqında danışıqlara başlamağı düşünürük. Bu zaman Avropa İttifaqı ilə müvafiq saziş pozulmayacaq. Türkiyə Avrasiya İttifaqı ilə başqa sahələrdə də əməkdaşlıq qurmaq istəyir" — nazir qeyd edib.
Nihad Zeybəkçi bildirib ki, keçən il Rusiya ilə Türkiyə arasında əmtəə dövriyyəsi 30 faiz artıb və bu, hələ başlanğıcdır: "Əməkdaşlığın bir çox sahələri var: neft kimyası, kənd təsərrüfatı və digərləri. İki ölkə arasında azad ticarət zonası haqqında saziş tərəfdaşlığı yeni səviyyəyə çıxaracaq. Bu saziş sərmayələri də əhatə edəcək".
