Ramil İbrahimov Sputnik Azərbaycan
BAKI, 5 iyul — Sputnik. Ötən gün təmas xətti yaxınlığında yerləşən Füzuli rayonunun Alxanlı kəndinin Ermənistan silahlı birləşmələri tərəfindən atəşə tutulması nəticəsində dünyasını dəyişən, 2 yaşlı Zəhra Quliyeva və nənəsi Sahibə Quliyeva bu gün kənd qəbiristanlığında dəf olunub. Sputnik Azərbaycan-ın bölgə müxbiri xəbər verir ki, dəfn mərasimində Quliyevlər ailəsinin yaxınları ilə yanaşı, rayon rəhbərliyi və yüzlərlə Füzuli sakini iştirak edib.
Övladını torpağa tapşıran Elnur Quliyev tək arzusunun körpə qızının qanının yerdə qalmaması olduğunu, bunun üçün özünün də silaha sarılmaq istədiyini deyib. Dəfndə iştirak edən rayon rəsmiləri Ermənistan tərəfinin dinc əhaliyə qarşı törətdiyi bu qəddarlığı Azərbaycan dövlətinin cavabsız qoymayacağını, beynəlxalq qurumların da buna ədalətli qiymət verməsinin lazım gəldiyini deyiblər.
Artıq insidentin baş verdiyi əraziyə ATƏT və BQXK-nin əməkdaşları da baş çəkiblər. Xatırladaq ki, Sahibə Quliyeva və 2 yaşlı Zəhra Quliyeva, ötən gün düşmən tərəfin artilleriya silahlarından atdığı mərmilərdən birinin həyətyanı sahədə partlaması nəticəsində həlak olublar. Qəlpə yarası alan 52 yaşlı Sərfinaz Quliyeva isə hospitala yerləşdirilib.
