BAKI, 23 iyun — Sputnik. Rusiya Aralıq dənizindəki döyüş gəmisindən İŞİD terror təşkilatının Suriyadakı mövqelərinə raket zərbələri endirib. Sputnik Azərbaycan "Milliyet"ə istinadla xəbər verir ki, Rusiya Müdafiə Nazirliyinin məlumatına görə, zərbə nəticəsində İŞİD-in Hama əyalətində idarəetmə məntəqələri, silah anbarları məhv edilib.
Dəməşq rejiminin ən böyük dəstəkçisi olan Rusiya, Türkiyə ilə birlikdə atəşkəs elan edilməsinin təşkilatçısı olub. Türkiyənin Prezident Administrasiyasından dünən verilən açıqlamada bildirilir ki, Suriyanın şimal-qərbində yerləşən İdlibdə Türkiyə və Rusiya hərbçiləri birlikdə əməliyyat həyata keçirəcəklər.
