BAKI, 23 okt-Sputnik. "OPEK-in (OPEC) noyabrın sonlarında keçiriləcək toplantısında neft istehsal edən ölkələrin ümumi razılığa gələcəyinə ümid edirik."
Sputnik RİA Novosti-yə istinadla xəbər verir ki, Səudiyyə Ərəbistanının energetika naziri Xalid əl-Falih bunu rusiyalı həmkarı Aleksandr Novakla görüşdə deyib.
O qeyd edib ki, Səudiyyə Ərəbistanı neft bazarının stabilləşdirilməsi niyyətindədir və Səudiyyə Ərəbistanı ilə Rusiyanın bəyan etdiyi mövqe neft bazarı üçün müsbət mesajdır.
OPEK-in sentyabrın 28-də Əlcəzairdə keçirilən qeyri-rəsmi görüşündə neft hasilatının gündəlik 32,5-33 milyon barel həcmində məhdudlaşdırılması razılaşdırılıb. Amma hər bir ölkə üçün konkret limitə dair razılaşma hələ əldə olunmayıb.
Yekun qərar OPEK-in noyabrın 30-da Vyanada keçiriləcək rəsmi toplantısında qəbul edilməlidir. OPEK neft bazarında stabilləşmə ilə bağlı tədbirlərə Rusiya, Azərbaycan və digər neft hasil edən ölkələrin də qoşulmasını istəyir.
