BAKI, 21 yan – Sputnik. Dünya üzrə xarici sərmayənin həcmi 36 % artdığı halda, Rusiyaya qoyulan birbaşa sərmayənin həcmi 92 % azalıb.
Sputnik BBC-yə istinadən bildirir ki, bu barədə BMT-nin illik hesabatında qeyd olunub.
Xəbərə görə, ötən il birbaşa xarici sərmayənin miqyası 1,7 trilyon dollar təşkil edib. Bu, 2008-ci il böhranından sonra ən yüksək göstərici sayılır.
Ən çox sərmayə ABŞ iqtisadiyyatına qoyulub (384 milyard dollar). İkinci yerdə Honkonq (163 milyard), üçüncü yerdə isə Çin (136 milyard dollar) gəlir. Sonrakı yerləri Niderland, Böyük Britaniya, Sinqapur, Hindistan, Braziliya, Kanada və Fransa tutur.
