BAKI, 9 yanvar — Sputnik. Rusiya "Şimal axını-2" qaz kəmərinin tikintisini özü başa çatdıracaq. Sputnik Azərbaycan xəbər verir ki, bunu Milli Energetika İnstitutunun baş direktoru Sergey Pravosudov "İzvestiya" qəzetinə deyib.
O, həmçinin deyib ki, İsveçrənin "Allseas" şirkəti layihədə işinə qayıda bilər.
"Əgər bu baş verməsə, Rusiya Federasiyasının suyun altında boru tikintisi üçün öz gəmisi – "Akademik Çerski" var", - ekspert bildirib.
Qeyd olunur ki, "Allseas" şirkətinin layihədə iştirak edib-etməməsindən asılı olmayaraq boru artıq bu il istifadəyə veriləcək.
ABŞ Prezidenti Donald Tramp 2019-cu il dekabrın 20-də "Şimal axını-2" və "Türk axını" qaz boru kəmərlərinə qarşı sanksiyaları nəzərdə tutan müdafiə büdcəsini imzalayıb.
ABŞ podratçı şirkətlərdən boru tikintisini dərhal dayandırmağı tələb edib. "Şimal axını-2" boru xəttini çəkən "Allseas" işlərini dayandırıb.
