Fikrət Sadıxov: “Rusiya Ermənistana təzyiq etməlidir”
“Rusiyanın Qarabağ münaqişəsinin həllini tapacağına ümidi var”. Bunu Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə Rusiyanın Azərbaycan, Ermənistan və Rusiyada keçiriləcək prezident seçkilərindən sonra Dağlıq Qarabağ münaqişəsinin nizamlanma prosesini necə görməsi ilə bağlı suala cavabında bildirib.
Politoloq Fikrət Sadıxov Sputnik Azərbaycan-a deyir ki, Mariya Zaxarova bu açıqlama ilə öz ölkəsinin mövqeyini səsləndirir:
“Problem ondadır ki, Rusiya Azərbaycanın strateji partnyorudur, digər tərəfdən Ermənistanın hərbi-siyasi müttəfiqi kimi münaqişənin həllinə çalışır. Rusiya başa düşməlidir ki, burada uzun illərdir danışıqlar gedir və biz bundan imtina etmirik. Bu məsələnin yeganə həll yolu beynəlxalq hüquq normalarına uyğun addımlar atılması, Rusiya tərəfindən Ermənistana müəyyən təzyiqlərin edilməsidir. Əgər Rusiya regionda sabitliyin qorunmasında maraqlıdırsa, Ermənistanı sadəcə sülhə çağırmaqla kifayətlənmək olmaz”.
