Zəncirvari qəza: 48 avtomobil toqquşub, yaralılar var - VİDEO

BAKI, 11 dekabr — Sputnik. Vladivostok şəhəri yaxınlığında qarın yağması səbəbindən zəncirvari yol-nəqliyyat hadisəsi baş verib.

Sputnik Azərbaycan RİA Novosti-yə istinadla xəbər verir ki, Xabarovsk-Vladivostok avtomobil yolunun 9-cu kilometrliyində, Novıy-De-Friz qəsəbəsində 48 avtomobil toqquşub. Nəticədə 12 nəfər xəsarət alıb, onların ikisi xəstəxanaya yerləşdirilib.

Rusiya Daxili İşlər Nazirliyinin regional idarəsindən bildiriblər ki, bu yolda hərəkət müvəqqəti olaraq məhdudlaşdırılıb. Rusiya DİN Yol Hərəkətində Təhlükəsizliyin Təmin edilməsi Baş İdarəsinin əməkdaşları hazırda vəziyyətə nəzarət edirlər və sürücülərə köməklik göstərirlər.

Vladivostok rəhbərliyi idarə və müəssisələrə iş gününü ixtisara salmağı tövsiyə edib. Çünki sinoptiklərin məlumatına saat 16:00-dan sonra qar güclənəcək, küləyin sürəti saniyədə 25 metrə çatacaq.