BAKI, 14 yanvar — Sputnik. Dünya bazarlarında neft qiymətləri ucuzlaşıb. Lakin ABŞ-nin yeni sanksiyalarının Rusiya neftinə təsiri bazarın əsas diqqət mərkəzində olduğu üçün hazırki qiymətlər son dörd ayın ən yüksək səviyyəsinə yaxın qalıb.
"Brent" markalı neft 28 sent ucuzlaşaraq 80,73 dollar, ABŞ-nin Qərbi Texas nefti (WTI) 18 sent azalaraq 78,64 dollar olub.
"Azeri Light" markalı Azərbaycan nefti isə 2,67 dollar artaraq 84,53 dollar təşkil edib.
Qeyd edək ki, Macarıstanın xarici işlər və xarici iqtisadi əlaqələr naziri Peter Siyarto deyib ki, ABŞ-nin Rusiyaya qarşı son sanksiyaları Mərkəzi Avropa üçün ciddi enerji problemləri yaradır və yanacağın qiymətinin artmasına səbəb olur.
"Bu yeni sanksiyalar paketi Mərkəzi Avropa üçün ciddi problem yaradır. Çünki burada Mərkəzi Avropada sanksiyalar siyahısına Serbiyaya neft tədarükündə əsas rol oynayan şirkət daxildir",- nazir deyib.
O qeyd edib ki, bu sanksiyalar neft və qaz tədarükünün azalmasına gətirib çıxarır və Mərkəzi Avropada yanacağın qiymətinin ciddi şəkildə artmasına səbəb ola bilər.
Xatırladaq ki, 2024-cü il ərzində dünya bazarlarında "Azeri Light" (CIF) markalı neftin 1 barelinin orta illik ixrac qiyməti bəlli olub. Ötən il ərzində Azərbaycan neftinin orta qiyməti 82,87 dollar olub.
2024-cü ildə Azərbaycan neftinin ən yüksək göstərici 94,73 dollar təşkil edib, ən minimal göstəricisi isə 71,87 dollar səviyyəsində olub.
Ötən il Azərbaycanın dövlət büdcəsində bir barel neftin orta illik ixrac qiyməti 75 dollardan hesablanıb. Cari ildə isə neftin bir barelinin orta illik ixrac qiyməti 70 dollar səviyyəsində götürülüb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.