BAKI, 26 dekabr — Sputnik. “Azərbaycan Hava Yolları” aviaşirkətinin J2-8243 nömrəli Bakı-Qroznı reysini yerinə yetirən “Embraer 190” təyyarəsinin Aktau şəhəri yazınlığında qəzaya uğraması nəticəsində həlak olan sərnişinlərin və ekipaj üzvlərinin siyahısı açıqlanıb.
Bu barədə Səhiyyə Nazirliyi məlumat yayıb.
Məlumata görə, həlak olanların bəzilərinin şəxsiyyətinin müəyyənləşdirilməsi istiqamətində işlər davam edir.
Qeyd edək ki, təyyarənin göyərtəsində olan 67 nəfərdən 38-i həlak olub, 29-u sağ qalıb.
Hadisədən sonra Prezident İlham Əliyevin tapşırığı ilə təyyarə qəzasının səbəblərinin araşdırılması üçün Baş nazir Əli Əsədovun rəhbərliyi ilə Dövlət Komissiyası yaradılıb.
Xatırladaq ki, dekabrın 25-də Bakı-Qroznı reysini yerinə yetirən “Embraer 190” tipli sərnişin təyyarəsinin Aktau şəhəri yaxınlığında qəzaya uğraması ilə əlaqədar Prezident İlham Əliyev dekabrın 26-sının Azərbaycanda matəm günü elan olunması barədə Sərəncam imzalayıb.
Aktau faciəsində qurbanlarının siyahısı
© Photo : Ministry of Health of the Republic of Azerbaijan
***
Təyyarənin qəzaya uğradığı yerdə axtarışlar başa çatdı
Xilasetmə xidmətləri ötən gün Qazaxıstanın Aktau şəhəri yaxınlığında qəzaya uğrayan "Azərbaycan Hava Yolları"na məxsus təyyarənin qəzaya uğradığı yerdə axtarışları başa çatdırıb. Bu barədə Qazaxıstan hökumətinin mətbuat xidməti məlumat yayıb.
"Xilasetmə xidmətləri axtarışları başa çatdırıb. Təyyarənin qəzaya uğraması nəticəsində 29 nəfər xəstəxanaya yerləşdirilib, 38 nəfər ölüb. Bütün zərərçəkənlər lazımi müayinələrdən keçirilib. Xəstələr vəziyyətlərinə uyğun olaraq xəstəxanaya yerləşdirilib və tam müalicə olunurlar", -məlumatda deyilir.
Dekabrın 25-də səhər saatlarında Bakıdan Qroznıya uçan Azərbaycan Hava Yollarına məxsus təyyarə Qazaxıstanın qərbində, Aktau şəhəri yaxınlığında qəzaya uğrayıb. Federal Hava Nəqliyyatı Agentliyinin məlumatına görə, təyyarə quşlarla toqquşduqdan sonra komandir Aktaudakı alternativ aerodroma getmək qərarına gəlib. Aviaşirkətin məlumatına görə, təyyarədə 62 sərnişin və 5 ekipaj üzvü olub. Qazaxıstan Fövqəladə Hallar Nazirliyinin məlumatına görə, 29 nəfər sağ qalıb. Rusiya səfirliyinin məlumatına görə, doqquz rusiyalı sağ qalıb. Ümumilikdə, siyahılara görə, təyyarədə 16 Rusiya vətəndaşı olub.