BAKI, 19 dekabr - Sputnik. Juninyo "Sevilya"dan təklif alanda bu xəbərə çox sevinib.
Bunu Misli Premyer Liqasının III turundan təxirə salınmış "Şamaxı" oyundan sonra keçirilən mətbuat konfransında "Qarabağ"ın baş məşqçisi Qurban Qurbanov deyib.
Təcrübəli mütəxəssis Ağdam təmsilçisinin hücumçusu Juninyonun İspaniya təmsilçisi "Sevilya"ya keçidini istisna etməyib:
"Juninyo bu xəbəri eşidəndə çox sevinib. Futbolçuya səmimi davranışına görə təşəkkür edirəm. Onun gedişi hər bir futbolçu kimi bizə problem yarada bilər. Çünki yeni gələnlər uyğunlaşma problemi yaşayırlar. "Sevilya" kimi klubdan təklif gəlməyi xoşdur. Hazırda danışıqlar davam edir. Futbolçularımız artıq Avropa bazarına çıxıb".
Təcrübəli mütəxəssis "Şamaxı"ya qalib gəldikləri görüş barəsində də danışıb:
"Hər oyunumuz gərgin mübarizə şəraitində keçir. Çalışırdıq ki, ilin sonuna yaxın futbolçularımız zədələnməsin. Təəssüf ki, bunun əksi oldu və bir neçə oyunçumuz sıradan çıxdı. Buna baxmayaraq, "Şamaxı"ya qalib gəldik və liderliyimizi möhkəmləndirdik" (Report).
Qeyd edək ki, III turun görüşündə "Qarabağ" səfərdə "Şamaxı"ya 1:0 hesabı ilə qalib gəlib.