BAKI, 26 noyabr— Sputnik. Milli Məclisdə "Bənövşə gölü" su anbarının bərpası məsələsi qaldırılıb.
Milli Məclisin bu gün keçirilən plenar iclasında "Azərbaycan Respublikasının 2025-ci il dövlət büdcəsi haqqında" qanun layihəsinin müzakirəsi zamanı deputat Azər Badamov deyib ki, Qusar şəhərinin yanındakı "Bənövşə gölü" su anbarı Qusar şəhəri və ətraf kəndlərini uzun illər içməli və təsərrüfat suyu ilə təmin edib.
"Amma son illər su anbarı baxımsız qalıb və yararsız hala gətirilib. Dünyada baş verən iqlim dəyişiklikləri şirin su mənbələrinin azalmasına gətirib çıxarır. Bu baxımdan su anbarlarının tikilməsi və bərpası çox aktual məsələdir. Bütün bunları nəzərə alaraq müvafiq qurumdan Qusar şəhərinin yanında yerləşən "Bənövşə gölü" su anbarının bərpasını diqqətdə saxlanılmasını xahiş edirəm", deputat bildirib.
Xatırladaq ki, bundan öncə Azərbaycan Dövlət Su Ehtiyatları Agentliyinin sədrinin müşaviri Əsəd Şirinov jurnalistlərə açıqlamasında bildirib ki, Azərbaycanda şirin su ehtiyatları getdikcə azalır, bu səbəbdən alternativ su mənbələrinin istifadəsi və təşviqi artırılır.
Əlavə edək ki, "Su ehtiyatlarından səmərəli istifadəyə dair Milli Strategiya"da qeyd edilir ki, Azərbaycanın bərpa olunan yerüstü şirin su ehtiyatları 2000-2023-cü illər ərzində 5,6 milyard kubmetr və ya 24% azalaraq 17,8 milyard kubmetrə düşüb. Startegiyaya əsasən, yerüstü şirin su ehtiyatlarının 13,2 milyard kubmetri transsərhəd sularından, 4,6 milyard kubmetri isə yerli çay axınlarından formalaşır.
Bildirilir ki, Azərbaycanın su ehtiyatları Cənubi Qafqazın digər ölkələri ilə müqayisədə məhduddur və bütün regiondakı su ehtiyatının təxminən 15 %-ni təşkil edir. Azərbaycanda adambaşına düşən su ehtiyatı da qonşu ölkələrlə müqayisədə ən aşağı səviyyədədir.