Tarixdə bu gün: 19 noyabr – FOTO

Mixail Lomonosov (1711-1765) - dünya səviyyəli birinci rusiyalı təbiətşünas alimi, kimyaçı və fizikdir. O, Moskva Dövlət Universitetinin qurucusudur.

Ceyms Abram Qarfild (1831-1881) - ABŞ-ın 20-ci prezidentidir (1881-ci ilin mart-sentyabr ayları).

İndira Qandi (1917-1984) - Hindistan siyasətçisidir. O, Hindistan tarixindəki yeganə qadın baş naziridir.

Yuri Knorozov (1922-1999) - Rusiya tarixçisi, etnoqrafı, dilçi, tərcüməçi və epiqrafçıdır.

Calvin Klein (1942) - ABŞ geyim dizayneridir. O, məhşur "Calvin Klein" şirkətinin yaradıcısıdir.

Meq Rayan (1961) - ABŞ aktrisası və kino prodüseridir.

Codi Foster (1962) - ABŞ kino və televiziya aktrisası, kinorejissor, prodüserdir. O, "Oskar" və "Qızıl Qlobus" mükafatları laureatıdır.

1190-cı ildə əsasən alman cəngavərlərdən ibarət olan Tevton dini cəngavər ordeni yaradılıb.

1493-cü ildə ispan dənizçisi Xristofor Kolumb Amerikaya ikinci səyahəti zamanı Puerto-Riko adasını kəşf edib.

1824-cü ildə Sankt-Peterburq tarixində ən dəhşətli daşqın baş verib. Neva çayında suyun səviyyəsi normadan 4,14 m yuxarı qalxıb. Nəticədə 462 ev dağılıb, 600-ə qədər insan suda boğulub, çoxlu sayda insan itkin düşüb.

1918-ci ildə Azərbaycan Milli Şurasının iclasında Xalq Cümhuriyyəti Parlamentinin çağırılması haqqında qərar qəbul edilib. Qərara əsasən, yeni parlamentdə 120 deputat olub: 80 yer müsəlmanlara (azərbaycanlılara), 21 yer ermənilərə, 10 yer rusiyalılara, 4 yer alman, yəhudi, gürcü və polyaklara ayrılıb. Bundan əlavə Bakı Həmkarlar Təşkilatı Şurası tərəfindən 3, Bakı Sənaye-Ticarət tərəfindən isə 2 nümayəndənin göndərilməsi də nəzərdə tutulub.

1969-cu ildə astronavtlar Çarlz Konrad, Alan Bin və Riçard Qordonun idarə etdiyi "Apollon-12" kosmik gəmisi Aya eniş edib.

1986-cı ildə SSRİ-də ilk dəfə "Fərdi əmək fəaliyyəti haqqında" qanun qəbul edilib. Bununla əlaqədar ölkədə, o cümlədən Azərbaycanda ilk özəl müəssisələr - kooperativlər yaradılmağa başlanıb.

1999-cu ildə İstanbulda ATƏT-ə üzv olan dövlət başçılarının sammiti başa çatıb. Azərbaycan Prezidenti Heydər Əliyev tədbirdə çıxış edərək sammitin sənədlərini imzalayıb. Onun çərçivəsində ATƏT-in Minsk Qrupunun həmsədr ölkələrinin (ABŞ, Rusiya, Fransa) xarici işlər nazirlərinin iştirakı ilə Azərbaycan və Ermənistan prezidentləri arasında görüş keçirilib.

2002-ci ildə NATO Parlament Assambleyasının İstanbulda keçirilən sessiyasında Azərbaycan təşkilata assosiativ üzv kimi qəbul edilib.

2021-ci ildə Azərbaycan Prezidenti İlham Əliyevin COVID-19 peyvəndi ilə bağlı irəli sürdüyü qətnamə BMT-yə üzv olan dövlətlər tərəfindən qəbul edilib. Qətnaməyə 126 BMT üzvü dövləti həmmüəllif qismində qoşulub.