Tarixdə bu gün: 15 noyabr – FOTO

BAKI, 15 noyabr — Sputnik. Noyabrın 15-də bir çox dünya şöhrətli aktyorlar, alimlər, idmançılar, yazıçılar və siyasətçilər dünyaya gəlib. Bu gün həmçinin tarixə düşən hadisələr də baş verib.

Xumar Zülfüqarova (1927-2017) - Azərbaycan SSR xalq artisti, rəqqasə və xoreoqrafdır. O, Azərbaycan Dövlət Rəqs Ansamblının yaradıcısı və Azərbaycan Dövlət Akademik Filarmoniyasının baletmeysteri olub.

İohann Kaspar Lafater (1741-1801) - İsveçrə yazıçısı, ilahiyyatçısı və şairidir.

Gerhard Hauptmann (1862-1946) - alman dramaturqudur. O, dramaturgiya sahəsinə verdiyi böyük töhfəyə görə "Nobel" mükafatı laureatıdır. Onun ən məşhur əsərləri: "Həmkar Krampton" komediyası, "Toxucular" və "Günəşin qürubundan əvvəl" pyesləridir.

Mixail Yakuşin (1910-1999) - Rusiya futbolçusu, xokkeyçisi və futbol üzrə məşqçidir. O, Komandanın tərkibində Moskvanın, SSRİ-nin, SSRİ kubokunun çempionu olub. 1936 və 1950-ci il mövsümlərinin 22 ən yaxşı xokkeyçisi siyahısına daxil edilib.

Roberto Kavalli (1940) - məşhur İtaliya modelyeridir. Onun "Roberto Cavalli" moda evi dəbdəbəli geyim, ətir və dəri aksesuarları satır.

Viktoriya Odintsova (1993) - Rusiya modeli və blogeridir.

1815-ci ildə Rusiyanın ilk "Yelizaveta" paroxodu Sankt-Peterburqdan Kronştadta yola düşüb.

1904-cü ildə ABŞ-da amerikalı Kinq Kemp Jillett ülgüc üçün patent alıb.

1919-cu ildə, Azərbaycan Xalq Cümhuriyyəti dövründə ilk ali təhsil müəssisəsində - Bakı Dövlət Universitetində dərslər başlayıb. Onun nizamnaməsi 1919-cu il sentyabrın 29-da Azərbaycan Xalq Cümhuriyyətinin parlamenti tərəfindən təsdiq edilib.

1933-cü ildə Moskvada ilk dəfə trolleybuslar fəaliyyətə başlayıb.

1991-ci ildə Azərbaycan Ali Sovetinin sessiyasında "Azərbaycan Respublikasının Dövlət Müstəqilliyi haqqında" Konstitusiya Aktı ilə əlaqədar referendumun keçirilməsi haqqında qərar qəbul edilib. Referendum 1991-ci il dekabrın 29-da keçirilib.