BAKI, 31 oktyabr — Sputnik. Çində Avrasiya İqtisadi Komissiyasının (AİK) nümayəndələri Şanxay Əməkdaşlıq Təşkilatının (ŞƏT) nümayəndələri ilə ərzaq təhlükəsizliyi və aqrar-sənaye kompleksinin inkişafı məsələlərini müzakirə ediblər.
Tədbirlər çərçivəsində kənd təsərrüfatı sahəsində yeni və yüksək texnologiyaların sərgisi, həmçinin ŞƏT-in müasir kənd təsərrüfatının inkişafına dair dəyirmi masa keçirilib.
AİK nümayəndələri ŞƏT ölkələrinin aqrar texnologiyaların mübadiləsi və təlim təcrübəsi ilə tanış olublar, həmçinin yüksək texnologiyalı kənd təsərrüfatı istehsalı sənaye zonasına da baxış keçiriblər.
Bundan əlavə, AİK nümayəndələri ilə ŞƏT Baş katibinin müavini Nuran Niyazəliyev ilə Qazaxıstan, Qırğızıstan və Rusiya nümayəndə heyətlərinin rəhbərləri arasında işgüzar görüşlər keçirilib.
Avrasiya İqtisadi Komissiyasının aqrar-sənaye siyasəti departamentinin direktor müavini Ayna Kusainova aqrar-sənaye kompleksinin davamlı inkişafının təmin edilməsi üçün Avrasiya İqtisadi İttifaqı (Aİİ) ölkələri arasında əməkdaşlıqdan danışıb.
"AİK və ŞƏT arasında kənd təsərrüfatı sahəsində əməkdaşlıq, həmçinin 2025-ci ildə Aİİ və ŞƏT ölkələrinin ərzaq təhlükəsizliyi, kənd təsərrüfatının davamlı inkişafı üzrə birgə tədbirlərin keçirilməsi müzakirə edilib", - AİK-dən bildirilib.
Aİİ 2015-ci il yanvarın 1-dən fəaliyyət göstərən beynəlxalq inteqrasiya iqtisadi birliyidir. Onun iştirakçıları Rusiya, Ermənistan, Belarus, Qazaxıstan və Qırğızıstandır. Bu, malların, xidmətlərin, kapitalın və işçi qüvvəsinin sərbəst hərəkəti ilə ən böyük iqtisadi birliklərdən biridir.