BAKI, 23 oktyabr — Sputnik. Rusiya Prezidenti Vladimir Putin Rusiya Federasiyasının dollardan imtina etmədiyini, əksinə, onun əvəzini axtarmağa məcbur olduğunu bildirib. Rusiya lideri Kazanda keçirilən BRİKS sammitində valyuta bazarındakı vəziyyəti şərh edib.
"Biz imtina etmirik, dollarla mübarizə aparmırıq, ancaq bizə onunla işləməyimizə icazə verilmirsə, o zaman biz nə edək?", Putin Kremlin dollarla bağlı siyasətini izah edib.
Prezidentin sözlərinə görə, hazırda ABŞ valyutasından silah kimi istifadə edilir ki, bu da Vaşinqtonun səhvidir və bu makromaliyyə alətinin imkanlarını azaldaraq ona olan inamı sarsıdır.
Bundan əvvəl "The Economist" yazıb ki, BRİKS sammitində Putin ABŞ dollarının çökməsi planını təqdim edəcək.
BRİKS doqquz ölkənin birliyidir: Rusiya, Braziliya, Hindistan, Çin, Cənubi Afrika, İran, BƏƏ, Misir və Efiopiya. Təşkilat 2006-cı ilin iyununda Braziliya, Rusiya, Hindistan və Çinin iqtisadiyyat nazirliklərinin rəhbərlərinin iştirakı ilə Sankt-Peterburq İqtisadi Forumu çərçivəsində yaranıb.
2009-cu ildən etibarən BRİKS ölkələrinin hökumətləri rəsmi sammitlərdə görüşürlər. Onlarla yanaşı, xarici işlər, maliyyə və digər nazirlər səviyyəsində də görüşlər keçirilir.
Bu yaxınlarda dolların dünya ehtiyatlarında payı 1995-ci ildən bəri ilk dəfə olaraq 58,41%-dən aşağı düşüb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.