BAKI, 20 oktyabr — Sputnik. Plasebolar miqren hücumlarının tezliyini və intensivliyini azalda bilər.
Bunu "Nature Medicine" jurnalında dərc olunan araşdırma göstərib.
Araşdırmada xroniki miqrendən əziyyət çəkən 400 könüllü iştirak edib. Onlar üç qrupa bölünüblər. Birinci qrupdakı xəstələrə real miqren dərmanı, ikinci qrupdakı iştirakçılar isə plasebo həbləri (heç bir aşkar dərman xassələri olmayan maddə) qəbul ediblər. Üçüncü qrup nəzarət kimi çıxış edib və heç bir müdaxiləyə məruz qalmayıb.
Eksperimental müddətin sonunda tədqiqatçılar iştirakçıların sağlamlıq məlumatlarını yeniləyiblər. Məlum olub ki, plasebo qəbul edənlər miqren tutmalarının tezliyində və şiddətində əhəmiyyətli dərəcədə azalma müşahidə ediblər. Bu terapevtik effekt birinci qrupun qəbul etdiyi real dərmanın təsiri ilə müqayisə oluna bilərdi. Müalicə və ya saxta müalicə almayan xəstələrdə heç bir yaxşılaşma müşahidə edilməyib.
Tədqiqatçılar izah ediblər ki, plasebo müalicəsinin effektivliyi müsbət gözləntilər və effektivliyə olan inanclar kimi psixoloji amillərlə əlaqəli ola bilər. Bu araşdırmanın nəticələri xroniki xəstəliklərin, o cümlədən miqrenin müalicəsində psixoloji komponentin əhəmiyyətini vurğulayır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.