BAKI, 1 oktyabr — Sputnik. Rusiya Federasiyası Finlandiya və Estoniyanın Fin körfəzinin Rusiya gəmiçiliyi üçün tam blokadaya almasını beynəlxalq dəniz hüququnun pozulması kimi qiymətləndirəcək.
Bunu "RİA Novosti"yə Rusiya Xarici İşlər Nazirliyindən bildiriblər.
KİV daha əvvəl xəbər vermişdi ki, Finlandiya və Estoniya hakimiyyət orqanları, təhlükə yaranarsa buxtanı Rusiya gəmiləri üçün bağlamaq planları hazırlayır. Rusiya Xarici İşlər Nazirliyi "RİA Novosti"yə cavab olaraq qeyd edib ki, Rusiya tərəfi hansı təhdidlərdən danışıldığını tam başa düşmür.
"Söhbət Fin körfəzində onlara bitişik zonaların sərhədlərinin müəyyən edilməsi planlarından gedirsə, onda belə bir addım onların suveren hüququdur. Eyni zamanda, BMT-nin Dəniz hüququ haqqında 1982-ci il Konvensiyasının müddəalarına uyğun olaraq bu cür hərəkətlər gəmiçiliyə mane olmağa və ona nəzarət etməyə imkan vermir", - nazirlik şərh edib.
Qeyd edək ki, Estoniya Müdafiə Qüvvələrinin komandanı Andrus Merilonun sözlərinə görə, Tallinn və Helsinki dəniz müdafiəsi sahəsində əməkdaşlığı genişləndirmək niyyətindədirlər. Təhlükə yaranacağı təqdirdə NATO ölkələrinin Fin körfəzini bağlayacağı açıqlanıb.