BAKI, 23 sentyabr — Sputnik. Rusiya Federasiyasında "uşaqsızlıq" hərəkatını (childfree — uşaqlardan azad) qadağan edən qanun layihəsi çərşənbə axşamı Dövlət Dumasına təqdim olunacaq. Bu barədə “RİA Novosti”yə Dövlət Dumasının deputatı Sultan Həmzəyev bildirib.
“Sabah deputat yoldaşlarımla birlikdə “Uşaqsızlıq” hərəkatını qadağan edən qanun layihəsini təqdim edəcəyik. Daha dəqiq desək: uşaq dünyaya gətirməkdən imtina haqqında. Bu gün qanun layihəsi konseptual olaraq Rusiya Federasiyası hökuməti tərəfindən dəstəklənir”, - deputat bildirib.
Dövlət Dumasının deputatı Sultan Həmzəyev
© Sputnik / Евгений Биятов
Sentyabrın 19-da Rusiya Federasiya Şurasının sədri Valentina Matviyenko deyib ki, Rusiyada "uşaqsızlıq" hərəkatı qanuni olaraq qadağan edilməlidir və bu, Ədliyyə Nazirliyində və ekspertlər səviyyəsində müzakirə olunur, lakin dövlət məcburi doğuşu təşviq etməyəcək.
Rusiya prezidentinin mətbuat katibi Dmitri Peskov jurnalistlərə deyib ki, "Uşaqsızlıq" hərəkatını qadağan etmək təklifləri fonunda doğum sayının artmasına mane olan hər şey rusiyalıların həyatından silinməlidir.
"Rusiyada doğum səviyyəsini artırmaq üçün lazım olan hər şey edilməlidir və buna mane olan hər şey, əlbəttə ki, bizim həyatımızda yoxa çıxmalıdır", - Kreml rəsmisi qeyd edib.
Peskov onu da bildirib ki, demoqrafik problem Rusiyanın qarşısında duran əsas problemlərdən biridir, doğum səviyyəsinin artırılması əsas prioritetlərdəndir.
"Demoqrafik problem bizim üzləşdiyimiz əsas problemlərdən biridir və təbii ki, doğum səviyyəsinin artırılması bütün hökumətin və ölkənin qarşısında duran əsas prioritetlərdən biridir", - Rusiya prezidentinin mətbuat katibi vurğulayıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.