BAKI, 23 sentyabr — Sputnik. Fransanın Total Energies şirkəti Çinin CNOOC dövlət neft və qaz korporasiyası ilə Çinə mayeləşdirilmiş təbii qazın (MTQ) tədarükünə dair müqaviləni 2034-cü ilə qədər uzadıb.
"Uzunmüddətli mayeləşdirilmiş təbii qaz satışını artırmaq strategiyasına uyğun olaraq, TotalEnergies Çinə ildə 1,25 milyon ton LNG tədarükü üçün CNOOC Korporasiyası ilə alqı-satqı müqaviləsini (SPA) 2034-cü ilə qədər beş il uzadacağını elan edib", - məlumatda deyilir.
TotalEnergies qeyd edib ki, bu qərar şirkətin Çin bazarında artan uzunmüddətli mövqeyini gücləndirəcək. Ölkədə mayeləşdirilmiş təbii qaz "enerji keçidi" adlanan prosesdə mühüm əhəmiyyət kəsb edir, ondan bərpa olunan enerji mənbələrindən yaranan fasilələr zamanı xidməti bərpa etmək üçün istifadə edilir.
MTQ həm də elektrik enerjisi istehsalı zamanı atmosferə daha çox emissiyaya malik kömürə alternativdir.
Fransız TotalEnergies dünyanın ən böyük enerji şirkətlərindən biridir. Avropada, Yaxın Şərqdə və Şimali Afrikada, Asiya-Sakit okean regionunda və ABŞ-da neft və qaz hasil etməklə 120-yə yaxın ölkədə fəaliyyət göstərir. Şirkətin işçi heyəti 100 min nəfərdən çoxdur.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.