BAKI, 11 sentyabr — Sputnik. BRİKS ölkələri beynəlxalq təhlükəsizlik məsələlərində koordinasiyanı gücləndirməlidirlər. Bunu Çinin xarici işlər naziri Van İ BRİKS-in yüksək səviyyəli təhlükəsizlik toplantısında deyib.
"Hazırda dünya ciddi təlatümlər yaşayır, biz böyük təhlükəsizlik təhdidləri ilə və təhlükəsizlik çatışmazlığı ilə üzləşirik. İnkişaf etməkdə olan ölkələr üçün bu o deməkdir ki, biz daxili işlərimizə müdaxilə ilə üzləşirik", - Van İ bildirib.
Nazir qeyd edib ki, Sankt-Peterburq görüşü belə təhlükələrlə mübarizə yollarını tapmaq məqsədi daşıyır.
"Bu görüş böyük əhəmiyyət kəsb edir. Üzv ölkələr sülhü və konstruktiv yanaşmaları müdafiə etməyə çalışırlar. Bütün bunlar bizim mexanizmimizin böyük canlılığından danışır", - Van İ qeyd edib.
Onun sözlərinə görə, BRİKS inkişaf edir və bu, bir çox ölkələr tərəfindən tələb olunur.
"Əlbəttə ki, soyuq müharibə təfəkkürünə əsaslananlar var, ona görə də biz strateji mənada tam şəkildə çoxtərəflilik, əməkdaşlıq və inkişaf etməkdə olan ölkələrin qanuni maraqlarını müdafiə etməliyik. Biz BRİKS-in vahid səsini dünya ictimaiyyətinə çatdırmalıyıq ki, beynəlxalq təhlükəsizlik məsələlərində koordinasiyanı gücləndirmək və artırmaq üçün təhlükəsizlik nəzarətçiləri mexanizmindən yaxşı istifadə edək", - Çinin xarici işlər naziri bildirib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.