BAKI, 5 avqust — Sputnik. Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Josep Borrell ötən həftə sonu Bişkekə səfəri zamanı Qırğızıstan nümayəndələrinə anti-Rusiya sanksiyalarının pozulmasının yolverilməzliyi barədə xəbərdarlıq edib. Bu barədə Qırğızıstan xarici işlər naziri Jeenbek Kulubayev mətbuat konfransında bildirib.
"Bizi sanksiyaları pozmamaq üçün xəbərdar edirlər. Biz dünyanın bütün regionları ilə əməkdaşlıq edirik və sanksiyalara əməl etmək həmişə mümkün olmayacaq. Ancaq buna baxmayaraq, bunlar tövsiyələr idi", - nazir bildirib.
Kulubayev qeyd edib ki, Borrell ilə danışıqların əsas mövzusu Avropa İttifaqı ilə Mərkəzi Asiya ölkələri, o cümlədən Qırğızıstan arasında əməkdaşlığın genişləndirilməsi üçün yol xəritəsinin həyata keçirilməsi olub. Tərəflər regional ticarət dövriyyəsinin artırılması imkanlarını da müzakirə ediblər.
Borrell avqustun 2-də Bişkekə gəlib. Qırğızıstanda o, ölkə başçısı Sadır Japarov, xarici işlər naziri Jeenbek Kulubayev və Fövqəladə Hallar Nazirliyinin rəhbəri Boobek Ajikyeyevlə görüşüb.