BAKI, 26 iyul — Sputnik. Azərbaycan Müdafiə Nazirliyi Ermənistana xəbərdarlıq edib. Xəbərdarlıqda deyilir ki, Ermənistan və onun havadarları Cənubi Qafqaz regionunda yeni müharibə ocağı yaratmaq kimi niyyətlərindən çəkinməlidirlər.
Müdafiə Nazirliyinin bu sərt bəyanatı Ermənistanda da rezonans doğurub. Ermənistan XİN açıqlama yayaraq sözü gedən təxribatların Ermənistan tərəfi ilə bağlı olmadığını iddia edib. Avropa İttifaqınının Avropa Sülh Fondunun Ermənistan müdafiə qabiliyyətinin artırılmasına ayırdığı 10 milyonluq yardım, ABŞ-Ermənistan hərbi təlimləri və son olaraq İrandan 500 milyon dollarlıq döyüş vasitələrinin alınması ilə bağlı iddialar regionda hərbi qarşıdurma ssenarisinin işə salınmaq üzrə olduğunu göstərir. Hər nə qədər də Ermənistana yardım edən bütün tərəflər addımlarını sülhə yönəlik və suveren hüququn istifadəsi kimi tədim etməyə çalışsa da, nəticədə baş verənlər xoşməramlı bütün niyyətləri sual altına alır.
Mövzu ilə bağlı millət vəkili Arzu Nağıyev və hərbi ekspert Ramil Məmmədli Sputnik Azərbaycan-a fikirlərini bölüşüblər.
Millət vəkili Arzu Nağıyev deyir ki, bu Ermənistana edilən ilk xəbərdarlıq deyil:
"Son vaxtlar Ermənistana hərbi yardımların artması gərginliyin artırılmasına və Azərbaycana qarşı edilir. Avropa Sülh Fonudunun ayırdığı vəsait yeni silahların alınması, bir alayın qurulması üçün xərclənəcək. Sülh adı altında təqdim olunsa da, bu yardım sülh üçün nəzərdə tutulmayıb. Kənar güclər Ermənistandan istifadə edərək Cənubi Qafqazda söz sahibi olmaq istəyirlər. Daha əvvəl də Fransa və Ermənistan müdafiə nazirlikləri arasında silah alınması ilə bağlı razılaşmalar əldə olunmuşdu və hətta həmin silahların bir qismi artıq Ermənistana çatdırılıb. Bütün bu addımlar Azərbaycanın təhlükəsizliyinə və suverenliyinə təhdid yaratmaq üçündür".
Deputat qeyd edir ki, Ermənistanı silahlandırmaqla yanaşı, Rusiyanın bölgədə nüfuzunu zəiflətməyə çalışırlar:
"Ermənistan daxili və xarici siyasəti, müstəqilliyi olmadığı üçün bütün bu yardımların nə ilə nəticələnəcəyini dərk edə bilmir. Hərbi təxribatların artmasına qarşı Azərbaycan tərəfindən mütləq addımlar atılacaq. Həmin sülh fondu bir vaxtlar Ukraynanı silahlandırmışdı, digər dövlətləri silahlandırmışdı. Onlar ciddi cəhdlə hər yerdə fiaskoya uğrayırlar, indi də Cənubi Qafqazda Ermənistanı plasdarm kimi seçiblər. Regionda silahlanmanın artması yenidən münaqişənin alovlanmasına və sülh prosesinin məhv edilməsinə xidmət edir", - millət vəkili fikirlərini yekunlaşdırıb.
Hərbi ekspert Ramil Məmmədli isə bildirib ki, Ermənistan və Azərbaycan arasında bu gərginliyin soyumamasının əsas səbəblərindən biri bölgədə kənar qüvvələrin mövqelərinin güclənməsidir:
"Ermənistan bundan öz məqsədləri üçün istifadə edir. Bu ölkə Qərbin dəstəyi ilə mövqelərini gücləndirməyə çalışır. Onun mövqelərini gücləndirən amillər sırasında ABŞ və Fransanın bu ölkənin müdafiə potensialı üçün etdiyi yardımlardır. Müharibə bitib və onun ardınca məğlub Ermənistan işğal altında saxladığı ərazilərin bir qismindən çıxmalı olub. Ermənistanın silahlandırılması üçün səfərbər olan ölkələr bu ölkə ilə böyük məbləğdə müqavilələr imzalayıblar".
Ekspert xatırladıb ki, müharibədən keçən üç illik dövr ərzində ABŞ, Aİ missiyası adı altında Fransa və Almaniya ordusunun zabitləri Ermənistana gəlib:
"Bütün bu qüvvələr Ermənistan ordusunun yenidən formalaşdırılması istiqamətində işlər aparır. Mən üç ildir ki, Qərb hərbi təmsilçilərinin Ermənistan ordusunda rol aldığını deyirəm. Bir neçə gün əvvəl bu təsdiqləndi. Bu faktiki olaraq ABŞ-ın Ermənistanda hərbi birləşmə formalaşdırma mənasına gəlir. Faktiki olaraq Ermənistan soyuq müharibənin getdiyi ölkəyə çevrilir".