BAKI, 26 iyun - Sputnik. NATO ölkələrinin daimi nümayəndələri çərşənbə günü Hollandiyanın baş naziri Mark Ruttenin növbəti dörd il üçün alyansın baş katibi vəzifəsinə namizədliyi ilə bağlı razılığa gəliblər. Bu barədə RİA Novosti xəbər yayıb.
“Çərşənbə günü Şimali Atlantika Şurası Yens Stoltenberqin yerinə Hollandiyanın baş naziri Mark Rutteni NATO-nun növbəti baş katibi təyin etmək qərarına gəlib”, - alyansın mətbuat xidməti bildirir.
Rutte yeni vəzifəsinin icrasına bu il oktyabrın 1-dən başlayacaq.
Təyinat digər namizəd Rumıniya prezidenti Klaus İohannisin namizədliyini geri götürməsindən və Ruttenin baş katib postuna yeganə iddiaçı olaraq qalmasından sonra mümkün olub.
Yens Stoltenberq artıq varisinin təyin olunmasını alqışlayıb.
“NATO müttəfiqləri tərəfindən Mark Ruttenin varisim seçilməsini ürəkdən alqışlayıram... NATO-nu etibarlı əllərə təhvil verdiyimi bilirəm”, - Stoltenberq X şəbəkəsində yazıb.
2014-cü ildən NATO-nun baş katibi vəzifəsində çalışan Yens Stoltenberq 2022-ci il oktyabrın 1-də vəzifəsini tərk etməli idi. lakin 2022-ci ilin martında sammit zamanı alyans ölkələrinin liderləri onun mandatının 2023-cü il sentyabrın 30-dək uzadılması barədə qərar qəbul ediblər, daha sonra bu mandat daha bir il uzadılıb. Beləliklə, onun səlahiyyətləri 2024-cü il oktyabrın 1-də başa çatır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.