Tarixdə bu gün: 23 iyun - FOTO

Gülcahan Güləhmədova-Martınova (1925-2018) - ilk azərbaycanlı qadın teatr rejissoru, Azərbaycan SSR xalq artisti. 1952-1982-ci illərdə Bakıda Rus Dram Teatrında quruluşçu-rejissor işləyib.

Anna Axmatova (1889-1966) - rus şairəsi. Onun ən tanınan əsərlərindən biri "xalq düşmənlərinin" arvad və analarının kədərindən bəhs edən "Rekviyem" poemasıdır.

Zinəddin Zidan (1972) - fransız futbolçu və məşqçi. O, futbol tarixinin ən böyük oyunçularından biridir. Zidan karyerasına Kannda mərkəz yarımmüdafiəçisi kimi başlayıb və daha sonra "Bordo"da çıxış edib. Lakin fransızı bütün dünyada məşhurlaşdıran klublar onun on iki kubok qazandığı "Yuventus" və "Real Madrid"dir.

Frensis Makdormand (1957) - ABŞ teatr və kino aktrisası. "Oscar", "Toni", "BAFTA", "Qızıl Qlobus", "Emmi" mükafatları laureatı. O, "Sadəcə qan", "Arizonanı tərbiyə edərkən", "Farqo", "Olmayan insan" və "Oxuduqdan sonra yandırmaq" filmlərində rol alıb.

1865-ci ildə ABŞ-da vətəndaş müharibəsi başa çatıb.

1868-ci ildə Viskonsin ştatında (ABŞ) yazı makinası patentləşdirilib - o, böyük bir masa ölçüsündə idi və yalnız böyük hərflərlə çap edirdi.

Beynəlxalq Olimpiya Günü. Həmin gün Beynəlxalq Olimpiya Komitəsinin (BOK) Sankt-Moritsdə keçirilən 42-ci sessiyası zamanı qəbul edilib və 1948-ci ildən bəri qeyd olunur.

1998-ci ildə Pittsburq Universitetinin (ABŞ) Tibb Mərkəzinin həkimləri tibb tarixində ilk dəfə olaraq süni şəkildə yetişdirilmiş beyin qabığı hüceyrələrinin insana transplantasiyasını həyata keçiriblər. Xəstə insult nəticəsində bədəninin sağ tərəfi iflic olduğu və nitqini itirdiyi yaşlı tibb bacısı Alma Serazini olub.

2006-cı ildən başlayaraq Azərbaycanda dövlət qulluqçularının peşə bayramı qeyd edilir.