BAKI, 11 may — Sputnik. Rusiya Elmlər Akademiyası Ural şöbəsinin Laverov adına Arktikanın kompleks öyrənilməsi üzrə Federal Tədqiqat Mərkəzinin mütəxəssisləri Arktika regionunda seysmik proseslərlə buz vəziyyəti arasında əlaqə aşkar ediblər.
Bu barədə "RuNews24" xəbər verib.
Alimlər hesab edirlər ki, yer qabığındakı dalğalanmalar aysberqlərin əmələ gəlməsinə, eləcə də buz sahələrinin mövqeyində və tərkibində dəyişikliklərə təsir edə bilər. Rusiya Elmlər Akademiyasının Tədqiqat Mərkəzinin seysmologiya laboratoriyasının rəhbəri Qalina Antonovskayanın izah etdiyi kimi, hazırda ekspertlər Arktika regionunda dəyişiklikləri izləməyə davam edirlər.
"Biz aydın bir tendensiya gördük: zəlzələlədən sonra buzlaqlarda bir sıra hadisələr müşayiət olunur. Bu, bir növ təbii səbəbli seysmiklikdir - hətta kiçik bir zəlzələ buzlaqların parçalanmasına və aysberqlərin əmələ gəlməsinə təsir göstərə biləcək bir sıra hadisələrə səbəb olur" - Antonovskaya bildirib.
Ekspert əlavə edib ki, 2017-2022-ci illər ərzində müşahidələr aparılıb və bu müddət ərzində alimlər 46 seysmik hadisəni təhlil ediblər. Onun sözlərinə görə, Arktikada ən çox zəlzələlər 4,9 baldan çox olmayıb, lakin son vaxtlar onların maqnitudası artmağa başlayıb. Sonradan bu, buzları hərəkətə gətirib.
"Hazırda biz ilk dəfə olaraq Arktika Rusiya arxipelaqlarında buz proseslərinin dinamikasının davamlı seysmik müşahidələrinin əsasını qoyuruq. Bu, buzlanma şəraitinin proqnozlaşdırılması üçün əhəmiyyətli məlumatdır" - o əlavə edib.
Bundan əvvəl ABŞ alimləri bildirmişdilər ki, qütb buzlarının əriməsi Yerin fırlanma sürətinin dəyişməsinə gətirib çıxarır ki, bu da öz növbəsində zamanın qlobal hesablanmasına təsir göstərir.