BAKI, 25 aprel — Sputnik. Azərbaycanın ilk Ombudsmanı Elmira Süleymanova dəfn olunub.
Mərhumə II Fəxri xiyabanda torpağa tapşırılıb.
Prezident İlham Əliyev və birinci xanım Mehriban Əliyeva Azərbaycanın ilk Ombudsmanı Elmira Süleymanovanın dəfn mərasiminə əklil göndərib.
Əklil mərhumənin məzarı üstünə qoyulub.
***
Azərbaycanın ilk İnsan Hüquqları üzrə Müvəkkili (Ombudsman) Elmira Süleymanova ilə vida mərasimi başa çatıb.
Təzəpir məscidində keçirilən mərasimdə mərhumənin yaxınları, ailə üzvləri, ictimaiyyət nümayəndələri iştirak ediblər.
E.Süleymanovanın cənazəsi dəfn olunmaq üçün II Fəxri xiyabana aparılır.
***
Azərbaycanın ilk İnsan Hüquqları üzrə müvəkkili (Ombudsman) Elmira Süleymanova vəfat edib.
O, 87 yaşında dünyasını dəyişib.
Hazırda mərhumla Təzə Pir məscidində vida mərasimi keçirilir.
Azərbaycanın ilk İnsan Hüquqları üzrə Müvəkkili (Ombudsman) Elmira Süleymanova II Fəxri xiyabanda dəfn olunacaq.
Qeyd edək ki, Elmira Teymur qızı Süleymanova 17 iyul 1937-ci ildə Bakı şəhərində anadan olub. Kimya elmləri doktoru, (1980), professor (1981), Azərbaycan Respublikası Prezidentinin fərdi təqaüdçüsü olub. E.Süleymanova 2002-2019-cu illərdə Azərbaycanın İnsan Hüquqları üzrə müvəkkili (Ombudsman) vəzifəsini tutub.
O, Azərbaycan Prezidenti İlham Əliyevin Sərəncamı ilə İnsan hüquqlarının qorunması sahəsində xidmətlərinə görə "Şöhrət" və "Şərəf" ordeni ilə təltif edilib.